VII шақырылымдағы Парламент Мәжілісінің ағымдағы сессиясына арналған іс-шаралар жоспарын Мәжіліс төрағасының орынбасары Балайым Кесебаева таныстырды. Оның айтуынша, депутаттар қарайтын жұмыстар жоспары 5 бөлімнен тұрады. Бірінші сессияға барлығы негізгі 35 іс-шараны өткізу жоспарланған, оның ішінде Мәжіліс комитетерінің 9 кеңейтілген тақырыптық отырысы, үкіметтік сағаттар, 1 халықаралық конференция, 9 дөңгелек үстел және басқа да іс-шаралар ұсынылып отыр.
"Мәжілістің халықаралық және парламентаралық қызметін іске асыру бойынша шаралар жеке кесте негізінде жүзеге асырылады. Бұған қоса, елдегі санитарлық-эпидемиологиялық жағдайды ескере отырып, аталған тақырыптық отырыстарды бейнеконференц-байланыс форматында өткізу қарастырылған", – деді Б.Кесебаева.
Сондай-ақ, жалпы отырыста Әйелдер істері және отбасылық-демографиялық саясат жөніндегі Ұлттық комиссия төрайымы, депутат Ләззат Рамазанова Қаржы және бюджет комитетінен Әлеуметтік-мәдени даму комитетіне, ал депутат Айгүл Нуркина Әлеуметтік-мәдени даму комитетінен Заңнама және сот-құқықтық реформа комитетіне ауыстырылғаны белгілі болды.
Қымбат Нұрғали
