Қазақстан Республикасы Парламенті Мәжілісінің төрағасы Нұрлан Нығматуллин Жетісу жеріндегі жұмысы сапарының бірінші күнін Іле ауданындағы "Aluminum of Kazakhstan" ЖШС ұжымымен кездесуден бастады.
"Индустриялық-инновациялық даму" бағдарламасы аясында ашылған зауыт бүгінгі таңда "HOFFMANN Aluminium" сауда белгісімен алюминий профильдерін өндіреді.
"Зауыт 1000-нан аса әртүрлі алюминий профилін еуропалық талапқа сай шығарады. Олар терезе-есік, жиһаз, офис құрылғыларын жасауға қолданылуда. Қазіргі зауыттың жобалық қуаты жылына - 12 000 тонна, алдағы уақытта бұл көрсеткішті еселей түсеміз", – деп таныстырды "Aluminum of Kazakhstan" ЖШС-нің директоры Нұрсұлтан Жұмабеков.
Келесі күні Нұрлан Нығматуллин Ескелді ауданы Қарабұлақ ауылындағы "Хильниченко және К" сенім серіктестігінің жұмыс барысымен танысты.
"Біз Елбасының ауылшаруашылығы саласын өркендетуге, соның ішінде қант қызылшасын дамытуға байланысты берген тапсырмаларын жүзеге асыру мақсатында қолда бар мүмкіндікті пайдалана отырып саланы өрістетуге күш салудамыз. Өздеріңіз білесіздер, өткен жылды жақсы табыстармен аяқтап, өткен жылы тәтті түбірдің гектар берекелілігін 700 центнерге дейін жеткіздік. Биылғы жоспарда ауқымды, дайындық та мығым", – дейді сенім серіктестігінің төрағасы Виктор Хильниченко.
