2 қыркүйектен бастап 15 қазан аралығында Медеу – Шымбұлақ аспалы жолдары жөндеу жұмыстарына жабылды. Бұл туралы тау-шаңғы курортының әкімшілігі әлеуметтік желідегі ресми парақшаларында ескертті.
"Біз жылына екі рет маусым басында аспалы жолдың негізгі бөлшектерін ауыстырып, жөндеу жұмыстарын жүргіземіз. Бұл жолаушылардың қауіпсіздігін қамтамасыз етеді", – деп жазды тау-шаңғы кешені ресми Instagram парақшасында.
Осы уақыт аралығында жолаушыларға экоавтобустар қызмет етеді. Олар аспалы жолдардың тәртібі бойынша күнде таңғы 10:00-ден кешкі 18: 00-ге дейін жұмыс істейді. Экоавтобустарға арналған жол жүру билеттерін Медеу бекетінде орналасқан кассадан алуға болады.
Естеріңізге сала кетсек, Медеуде орналасқан базалық бекеттен Шымбұлақ тау-шаңғы курортына апаратын аспалы жолдар 2010 жылы ашылған болатын. Олардың жалпы ұзындығы – 4,5 шақырым. Медеуден тау-шаңғы кешенінің ең биік нүктесіне дейін 20 минуттың ішінде жетуге болады. Аспалы жол бойымен 114 кабина ары-бері қатынайды. Олардың әрқайсысының сыйымдылығы 8 жолаушыға есептелген.
