Биылғы наурыз айында Медициналық сақтандыру қорына 8,6 млрд теңгеден астам жарна түсті, деп хабарлайды қордың жұртшылықпен байланыс департаменті.
МӘМС пакеті шеңберіндегі қызметтер ақысын төлеуге арналған жүйе іске 2017 жылдың 1 шілдесінен бастап қосылған еді. 2019 жылдың 31 наурызына дейін қорға 157,8 млрд теңге көлемінде жарна аударылыпты.
"Жалпы жинақтың 149,1 млрд теңгесі (шамамен 94,5%) жұмыс берушілердің аударымдары болса, қалған 8,7 млрд теңге (5,5% жуығы) – жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі", – делінген хабарламада.
Аймақтық тұрғыдан алғанда, жарна төлеу жағынан бұрынғыша Алматы, Нұр-Сұлтан қалалары мен Қарағанды облысы алда тұр екен.
Айта кетсек, бұл жиналып жатқан қаржы Ұлттық банкте сақталады. Еліміздің бас банкімен қаржыны сенімгерлік басқару туралы келісім бекітілген.
