Жұмысы жоқ, Медициналық сақтандыру қорына ақша аудармайтын қазақстандықтарға жүргізуші куәлігі мен қару-жарақ алуға рұқсат берілмеуі мүмкін.
Бұл туралы Мәжілістегі үкімет сағатында Денсаулық сақтау министрі Ажар Ғиният мәлім етті.
Қазір 3 млн-ға жуық қазақстандық медициналық қызметтен тыс қалып отыр. Оларды мемлекет есебінен ішінара сақтандыруды жоспарлап отыр.
"Жүйенің ұзақ мерзімді қаржылық тұрақтылығын қамтамасыз ету үшін келесі қажетті шарттарды ескеру қажет: 2025 жылдан бастап әрбір азамат салық декларациясын міндетті түрде тапсыратын болады. Осылайша, сақтандырылмаған азаматтардың табысы белгілі болып, 700 мыңға жуық адамды міндетті медициналық сақтандыру жүйесіне тарту жоспарлануда", – деді Ажар Ғиният.
Сонымен қатар, сақтандырылмаған тұлғаларға медициналық және онымен байланысты мемлекеттік қызметтерге шектеу қою ұсынылады.
"Мысалы, көлік жүргізу, қару сақтау, т.б.", - деп қосты Ажар Ғиният.
Осылайша, оның айтуынша, қордың қаржылық тұрақтылығын сақтауға болады.
