Медициналық ЖОО студенттерінің шәкіртақысы 2025 жылға дейін жыл сайын 20%-ға дейін өсед, деп жазады inbusiness.kz ДСМ баспасөз қызметіне сілтеме жасап.
Президент пен "Аманат" партиясының тапсырмасы бойынша шәкіртақы айтарлықтай ұлғайтылды. Мысалы, бакалавриат үшін ол 2 есеге жуық, интерндерде – 25%-ға, резиденттер, магистранттар, докторанттарда 2021 жылы 15%-ға артты.
"2025 жылға дейін шәкіртақыны жыл сайын 15% және 20%-ға ұлғайту жоспарлануда. Бұл жақсы оқуға қосымша серпін береді, сондай-ақ біздің ЖОО-ларға мықты талапкерлерді қосымша тартады", - дейді ДСМ Ғылым және адами ресурстар департаментінің директоры Дәулет Алдыңғұров.
Мемлекет басшысының тапсырмасын іске асыру мақсатында 2023 жылы резидентура гранттарының санын 2500-ге дейін ұлғайту жоспарланып отыр. Ақпаратқа сәйкес, отандық университеттерді клиникалық базаларымен қамтамасыз ету мақсатында 6 университеттік аурухананың құрылысын жүзеге асыру басталды.
Дәулет Алдыңғұровтың айтуынша, ведомство 2021 жылдан бастап өңірлердің өтінімдерінің негізінде резидентурада гранттарды бөлуді енгізген.
"2022 жылғы 8 ақпанда салалық біліктілік шеңбері бекітілді. Осы оқу жылынан бастап санитариялық-эпидемиологиялық қызмет мамандарын даярлаудың 5 жылдық бағдарламасы енгізілді", - делінген министрлік таратқан хабарламада.
Бұдан басқа кәсіби стандарттарды әзірлеу бойынша жұмыстар жүргізілуде.
Ведомствоның мәліметінше, ҒАРД бюджеттік бағдарламасы аясында 4200 дәрігер, оның ішінде 138-і шетелде, 2650 мейіргер оқытылды.
