Мексикада жер сілкінісінен қаза тапқан адамдар саны 96-ға жетті, деп хабарлайды 24.kz.
Зілзаладан қатты зардап шеккен елдің оңтүстігіндегі 3 штат. Опат болғандардың дені – Оахака мен оған көршілес елді мекеннің тұрғындары. Табиғат апатынан кейін тағы 300-ден астам дүмпу тіркелген. Оахака штаты губернаторының айтуынша, шамамен 12 мың ғимарат қирап қалған. Бірақ бұл көрсеткіш әлі де өсуі мүмкін. 1 миллионға жуық штат тұрғыны көмекке зәру, ал эпицентрге жақын орналасқан көршілес штаттағы жағдай одан да мүшкіл: апаттан 1,5 млн адам зардап шеккен. Барлығы азық-түлік, су және жарықсыз қалды.
Естеріңізге сала кетейік, 8 қыркүйек күні Мексиканың оңтүстік жағалауында 8,2 баллдық жер сілкінісі болды. Зілзала ошағы Пиджиджапан қаласынан оңтүстік-батысқа қарай 120 шақырымдай жерде тіркелді. Ел билігі бұл апатты соңғы 30 жылдағы ең жойқын зілзала деп отыр.
