Білім және ғылым министрлігінің "Оқулық" ғылыми-практикалық орталығының директоры Ғани Бейсембаев Орталық коммуникациялар қызметінде өткен брифингте "Оқуға құштар мектеп" жобасын таныстырды. Жоба аясында мектеп кітапханалары жаңа көркем әдебиеттермен толығатынын айта келе, ол 5 жылға жоспарланған бағдарламаның жай-жапсарын баян етті.
"Бүгінде еліміздегі мектептерде 200 млн-нан аса әдебиеттер қоры бар. Оның 38 млн-ы – көркем әдебиеттер мен мерзімді басылымдардың тізімі. Олардың сапасына мән берер болсақ, басым бөлігі 1980-1990 жылдардың аяғында шыққан кітаптар және 20-30%-ы жарамсыз екені анықталып отыр. Соған байланысты шұғыл түрде мектеп кітапханаларын көркем әдебиеттермен толықтыру мәселесі бірінші кезекте қолға алынды", – деді ол.
Ғани Бейсембаевтың айтуынша, бұл мәселені шешу алдағы 5 жылға жоспарланған. Әр жыл сайын кітапханалар 20%-ға көркем әдебиеттермен толықтырылады.
Құралай Құдайберген
