Қазақстанда "Балаға лайық" акциясының бірінші кезеңі аяқталды. Мектептер анықталған кемшіліктерді 1 қыркүйекке дейін жоюы тиіс. Бұл туралы БҒМ Балалардың құқықтарын қорғау комитетінің төрағасы Есенғазы Иманғалиев айтты, деп хабарлайды inbusiness.kz.
Оның айтуынша, бірінші кезеңде комитетке 110 мектептен 1 мыңнан аса шағым түскен. Олардың басым бөлігі мектептердегі гигиеналық құралдардың, жуынатын бөлмелерде қалқалардың болмауы, дәретхана кабиналарындағы есіктердің дұрыс жұмыс істемеуі және тағы басқасына қатысты болған. Ауладағы мектеп дәретханалары туралы 3 шағым түскен.
"Акцияның бірінші кезеңі аяқталды. Білім беру ұйымдарында кез келген адам әжетхана мен асхананың фото-видеосын жібере алатын мессенджерлердің QR-кодтары бар буклеттер таратылды. Акцияға оқушылар мен ата-аналар белсенді қатысты. Мектептер мен оларды қаржыландыру әкімдіктердің құзыретінде болғандықтан білім ордаларының санитарлық-тұрмыстық жағдайы мен асханаларының жай-күйіне қатысты барлық шағым әкімдіктерге жіберілді", – деді комитет төрағасы.
Есенғазы Иманғалиев мектептерге акция кезінде анықталған кемшіліктер мен ескертулерді жоюға уақыт берілгенін атап өтті.
"Олар 1 қыркүйекке дейін, яғни жаңа оқу жылы басталғанға дейін жіберілген қателіктермен жұмыс істеуі керек. Әкімдіктер кемшіліктерді жойғаннан кейін instagram-дағы @balaga.laiyq парақшасында мектеп әжетханалары мен асханаларының "дейінгі және кейінгі" фотолар мен видеоларды жариялайды", – деді басшы.
Айта кетейік, Қазақстандағы мектеп дәретханалары мен асханаларына мониторинг жүргізуге арналған "Балаға лайық" акциясы бір ай бұрын басталған болатын.
