Премьер-Министр Асқар Мамин Президентке коронавирус індетіне қарсы отандық вакцинаның әзірлену барысы туралы баяндады, деп хабарлайды Ақорда баспасөз қызметі.
Үкімет басшысы 29 қараша күні клиникалық сынақтардың 1 және 2-кезеңдерінің аяқталғанын, вакцинаның кері әсері анықталмағанын атап, оның жоғары тиімділігіне тоқталды.
25 желтоқсаннан бастап клиникалық сынақтардың 3-ші кезеңінде аталған вакцина 3 мың еріктіге егіледі. Сынақтар толығымен 2021 жылы наурыздың соңына қарай аяқталады.
Сонымен қатар Мемлекет басшысына осы жылдың соңына дейін 2 миллион мөлшер көлеміндегі отандық вакцинаның алғашқы партиясы шығарылатыны туралы ақпарат берілді.
Қасым-Жомарт Тоқаев Асқар Маминге отандық вакцина өндірісіне қатысты берілген тапсырманы жедел орындағаны үшін алғыс білдіріп, дәрінің тиімділігіне баса мән беруді және тұрғындарға қол жетімді болуын бақылауда ұстауды тапсырды.
