Мәскеу қалалық соты 22 жастағы студент Глеб Вердиянды мемлекетке опасыздық жасауға дайындалды деген айыппен алты жылға қатаң режимдегі колонияда өтеуге үкім шығарды. Бұл ретте Мәскеу қалалық сотының сайтында бұл істі қарау мен үкімнің жарияланған күні туралы деректер жоқ, деп хабарлайды inbusiness.kz.
Сондай-ақ Вердиянның нақты не үшін айыпталғаны белгісіз.
Сот Вердиянды 30 бап бойынша мемлекетке опасыздық жасауға "дайындық" жасағаны үшін кінәлі деп таныды. Сонымен қатар, оған 200 000 рубль айыппұл салынып, 1 жылға (жазасын өтегеннен кейін) шектеу қойылды.
Федералдық қауіпсіздік қызметі де, сот та үкімнің жарияланған күнін және оған нақты қандай айып тағылғанын айтқан жоқ. Мәскеу қалалық сотының сайтында бұл істі қарау мен үкімнің жарияланған күні туралы деректер жоқ. Ең болмағанда үкімнің қарар бөлігі заң бойынша ашық жариялануы керек еді.
21 жастағы Глеб Вердиян қамауға алынған кезде Ресейдегі мемлекетке опасыздық жасау бабы бойынша ең жас айыпталушы болған. Бірақ бүгінге дейін қауіпсіздік қызметі мұндай істер бойынша тағы 18 және 19 жастағы студенттерді ұстады.
Ашық ақпарат көздеріне сүйенсек, Вердиян Украинада дүниеге келген. Оның отбасы Астраханьға шамамен 20 жыл бұрын көшіп келген. Федералдық қауіпсіздік қызметі соғыс кезінде сатқындық жасады деп айыптаған көптеген айыпталушылардың Украинада туыстары бар.
Вердиян 2022 жылы 28 қазанда "ұсақ бұзақылық" бабы бойынша ұсталды. Ол өзі тұратын Астраханьнан Мәскеуге келген соң ғана арнайы абақтыға қамалды. Студент сол күні Ыстамбұлға ұшпақ болған, Внуково әуежайының жанындағы аялдамада ол "балағат сөздер айтты" деген айыппен ұсталып, 10 тәулікке қамауға алынды.
7 қарашада сағат 15.10-да Вердиянды тергеу изоляторынан шығару керек болған. Дегенмен кешкі 18.30-да Мәскеудің Лефортовский сотында оған қатысты бұлтартпау шарасын таңдау бойынша жиналыс басталып, онда студентті полиция қызметкерлері емес, қауіпсіздік қызметі қызметкерлері алып кетті. Сот Вердиянды мемлекетке опасыздық жасау айыбы бойынша екі айға Лефортово тергеу изоляторына жіберді.
Кейінірек Вердиянның мемлекетке опасыздық жасамағаны белгілі болды, ал Федералдық қауіпсіздік қызметі оны осы бап бойынша "қылмыс жасауға дайындық" (яғни, сатқындыққа дайындалу) деп айыптайды.
Осы схемаға сәйкес, соғыс кезінде қауіпсіздік күштері айыпталушыларды "тыңшылық істері" бойынша жаппай оқшаулап жатыр. Олар халықаралық әуежайларда және шекара бекеттерінде Грузияға, Қазақстанға немесе Түркияға бара жатқан жолда алаяқтықпен ұсталып, изоляторға жіберілген.
