Қаржы министрі Мәди Такиев Сенаттың жалпы отырысында 2023 жылғы республикалық бюджеттің атқарылуы туралы Үкіметтің есебін баяндады, деп хабарлайды inbusiness.kz сайты.
"Өткен жылдың қорытындылары оң серпінмен атап өтілді. 2023 жылы жалпы ішкі өнімнің өсуі 5,1%-ды құрады. Бұған негізгі капиталға инвестициялардың өсуі мен экономиканың негізгі салалары, өңдеу өнеркәсібі, құрылыс, сауда-саттық, көлік салаларының дамуы есебінен қол жеткізілді. Жылдық инфляция деңгейі 2022 жылмен салыстырғанда 2 есеге төмендеп, 9,8%-ды құрады. Қажетті қаржыландырумен қамтамасыз ету, мемлекетке өзінің әлеуметтік міндеттемелердің барлығын орындауға мүмкіндік берді", - деді ведомство басшысы.
Қаржы министрінің сөзінше, жалпы бюджет тапшылығы 3,1 трлн теңге немесе жалпы ішкі өнімге 2,6%-ды құрады.
"2024 жылғы 1 қаңтары жағдайы бойынша мемлекеттік борыш 27,2 трлн теңге немесе жалпы ішкі өнімге 22,8%-ды құрады", - деді Мәди Такиев.
