Ақмола облысы Бурабай демалыс орнында республикалық мемлекеттік санаторийдің экс-директоры пара алғаны үшін сотталды, деп хабарлайды Sputnik тілшісі сот актісіне сілтеме жасап.
2017 жылы маусымда ер адам Бурабай ауданындағы "Бурабай" республикалық реабилитация орталығы" мемлекеттік кәсіпорнының директоры болып тағайындалған, 2018 жылы мамырда мемлекеттік сатып алу қорытындысына сәйкес "Бурабай" орталығындағы науқастарды тамақпен қамтамасыз ету бойынша "Б" ЖК-мен 105 миллион 304 мың 775 теңгеге келісім жасалған. Санаторий басшысы қолдау көрсеткені үшін тендер жеңімпазынан жалпы соманың 10 пайызын талап етіпті. Кәсіпкер әйел қиындықтарды сылтауратып, пара көлемін 5 пайызға дейін төмендеткен.
Орталық басшысы әйел адамнан ақша алу үшін Щучинскідегі дәмханаға шақырады. Ойын-сауық орнына ол орынбасарымен бірге Lexus LX470 жеке көлігімен келген.
Кешкі ас ішіп болған соң, шенеунік орынбасарынан көліктің кілтін алып, пульт арқылы есігін ашады, кәсіпкер әйелге 5 миллион теңгені көліктің артқы орындығына қоюды сұрайды. Осылайша, жемқорлыққа қарсы ведомство қызметкерлері оны оқиға орнында ұстады.
Күдікті кінәсін мойындап, процестік келісім жасасыпты. Бурабай аудандық соты 38 жастағы бұрынғы директорды пара алғаны үшін айыпты деп таныды. Ол үш жарты жылға бас бостандығынан айырылып, мемлекеттік қызмет атқаруына өмір бойына тыйым салынды. Бұдан бөлек, сот бақылаудың әлсіздігі мен жемқорлықтың алдын алу шараларының жоқтығына байланысты денсаулық сақтау министріне де жеке қаулы шығарды.
