2016 жылы Қазақстанда мемлекеттік тілді меңгерген халықтың үлесі 82 пайызға жетті. Мұны премьер-министр Бақытжан Сағынтаевтың төрағалығымен өткен үкімет отырысында мәдениет және спорт министрі Арыстанбек Мұхамедиұлы баяндады, деп хабарлайды үкімет басшысының баспасөз қызметі.
Министр 2014 жылы мемлекеттік тілді меңгерген халық үлесі 72,1% болса, 2015 жылы 76,3%-ға жеткен. Қазір "Қазтест" жүйесі негізінде қазақ тілін білу деңгейін анықтау жыл сайын артып келеді. 2016 жылы тестілеуден өткендердің жалпы саны – 73732 адамға, оның ішінде мемлекеттік қызметшілер саны шамамен 40000 адамға (53,5%) жеткен.
"Мемлекеттік бағдарлама аясында 2014-2016 жылдар аралығында оқу-әдістемелік құралдар, әлем әдебиеті классиктерінің шығармалары, танымдық, ғылыми-публицистикалық, балаларға арналған кітаптар және т.б. қоса алғанда, барлығы шамамен 88 баспа жобасы жарық көрді. Оның ішінде өзге тілдерде шығарылған жобалар саны – 24. Сонымен қатар мемлекеттік тілді үйретудің жаңа әдістемелері "Қазақ сөзі" оқу құралдары әзірленді", – дейді Арыстанбек Мұхамедиұлы.
Өткен жылдың қорытындысында орталық және жергілікті атқарушы органдардағы мемлекеттік тілдегі құжат айналымының үлесі 91% болды. Сонымен қатар елімізде 87 аймақтық қазақ тілін оқыту орталығы жұмыс істейді.
"Дегенмен статистикалық-есеп және қаржылық құжаттамалардың мемлекеттік тілге ауыспау фактілері бар", – дейді министр.
Еске сала кетейік, Қазақстанда тіл саясаты "Қазақстан Республикасындағы тіл туралы" заңына, тіл қолдану мен дамытудың 2011-2020 жылдарға арналған мемлекеттік бағдарламасына сәйкес жүзеге асырылады.
Бүгінгі күні бағдарламаның екінші кезеңін жүзеге асыру жұмысы аяқталды.
