Мәдениет және ақпарат министрі Аида Балаева мұсылман киімі хиджаб төңірегіндегі шуға пікір білдірді, деп хабарлайды inbusiness.kz.
"Қазір әлеуметтік желіде мектептерде хиджаб кию мәселесіне қатысты талқы тоқтар емес. Осыған байланысты діни салаға жауапты лауазымды тұлға ретінде, өз тарапымнан түсініктеме беруді жөн көріп отырмын. Атазаңымызға сәйкес Қазақстанда дін мемлекеттен бөлінген. Сөз жоқ, мемлекет дін бостандығына кепілдік береді. Бірақ біз - зайырлы елміз! Сол үшін де мемлекеттік саясаттың барлық мәселелері діни пәтуалармен емес, азаматтық нормалармен реттеледі", - деп атап өтті Аида Балаева.
Оның айтуынша, құқықтық-нормативті актілер әрбір оқушыға мектеп қабырғасында арнайы бекітілген форма киюді міндеттейді.
Өйткені, білім беру ерекшелігі бірыңғайлықты талап етеді.
"Ал Конституциямыз бойынша мектептің міндеті – ел азаматтарына сапалы білім беруге кепілдік беру және оны қамтамасыз ету. Сондықтан да, мектепте бала ең алдымен сапалы білім алуы керек. Содан кейін барып, ержете келе діни наным-сенімін, қандай киім үлгісін киетінін өзі шешеді деп ойлаймын", - деп түйіндеді министр.
Еске сала кетсек, бұған дейін Қазақстан мұсылмандары діни басқармасы мектепке орамал тағу мәселесіне қатысты түсінік бергенін жазған болатынбыз.
