Германияның канцлері Ангела Меркель жаңа президент Дональ Трамптың кезінде Германия мен АҚШ қарым-қатынасын жақсарту үшін қандай жоспар құрып отырғанын айтып берді, деп жазады "КоммерсантЪ".
"Егер біз халықаралық экономика, халықаралық сауда мәселесінде ортақ ереже, ортақ құндылықтар мен өзара іс-қимыл негізінде ынтымақтасатын болсақ, сондай-ақ әскери альянсқа өз үлесімізді қосатын болсақ, ол бәрімізге пайда әкелетініне бек сенімдімін", – деп келтіреді Меркель ханымның сөзін Reuters.
Мұның алдында Дональд Трамп Ангела Меркельдің миграциялық саясатын сынға алған еді. АҚШ президенті оның елге 1 млн мигрантты кіргізіп, үлкен қателік жасағанын айтқан еді.
Естеріңізге сала кетейік, еуропа көшбасшылары Дональд Трамптың НАТО-ны ескірген ұйым деп атап, Ұлыбританияның Еуроодақтан шығуын қолдайтындығы туралы мәлімдемесіне қарсылық білдірген болатын. Трамп мырзаның одақтастармен ымыраласуға ниетінің жоқтығы, оларды Еуроодақ пен НАТО-ны бірлесе жұмыс істеуінің жаңа жолдарын іздестіруге мәжбүр етіп отыр. Еуроодақтың мүшелері болашақта Мәскеу мен Вашингтон "тіл табысып" кетеді деп қауіптеніп отыр.
