Болжам бойынша, елімізде 3500 коронавирус дертін жұқтырған науқас болса, оның 5%-ының ғана жағдайы күрделі болуы мүмкін, деп хабарлайды ҚазАқпарат.
"Біз мониторинг жасап отырмыз. Қазіргі күнде 3000-ға жуық аппарат бар. Ол жедел жәрдем көліктерінде, аудандық ауруханаларда және үлкен медициналық ұйымдарда жеткілікті деңгейде бар. Бұл – тез тозатын жабдық, сол себепті ел бойынша қажеттілік бар. Жылдың басында ел бойынша 927 аппарат болған, бірақ қазіргі жағдайда инфекциялық ауруханаларға 167 аппарат қойылған. Қазір басқа ауруханалардан 70 аппарат жеткізуге дайын отырмыз" , – дейді ҚР Денсаулық сақтау министрі Елжан Біртанов.
Ол бұл аппаратты сатып алу қажет екенін айтты.
"Дүние жүзінде осындай мәселе көтерілді. Өткен аптада ҚР Денсаулық сақтау министрлігі 270 аппарат сатып алу бойынша тендер өткізіп, келісімшартқа қол қойды. Ол аппарат сәуір айында келеді. Сонымен барлық инфекциялық және басқа да ауруханаларда бұл аппарат жеткілікті болады. Осыған қосымша отандық мобильдік 180 аппарат келеді. Демеушілер көмектесіп, бізге беріп жатыр. Қазіргі уақытта кейбір отандық өндірушілер төртенше жағдайға байланысты бізге көмек көрсетіп, өндірісін тездетіп көбейтіп жатыр. Болжам бойынша, 3500 коронавирус дертін жұқтырған науқас болса, оның 5%-ының ғана жағдайы күрделі болуы мүмкін. Осы науқастарға қажетті аппарат саны жеткілікті", – дейді ол.
