Әлеуметтік желілерде сырт көзге балалар мультфильміне ұқсайтын, алайда мазмұнында деструктивті ақпарат бар қысқаметражды видеолардың таралуы жиілеп кетті.
Комитеттің айтуынша, соңғы уақытта Brainrot (аудармасы — "мидың шіруі") хэштегімен таралып жатқан 15–45 секундтық анимациялық роликтер баланың санасына кері әсер етуі мүмкін. Онда "траллалеро траллаеро" (аудармасы — "Алла — шошқа") сияқты мән-мағынасыз, бірақ құлаққа сіңімді сөздер жиі қайталанып, психологиялық триггер ретінде қолданылған.
Сондай-ақ кейбір видеоларда "Бомбардино крокадило — мен Палестинадағы балаларға бомба тастағанды ұнатамын" деген сияқты астарлы, жасырын дыбыстық жолдар бар.
- Мұндай контент балалардың адамгершілік құндылықтарына, мінез-құлқына және психоэмоциялық саулығына зиян келтіруі мүмкін, - делінген комитеттің мәлімдемесінде.
Осы жағдайға байланысты комитет құқықтық базаны жетілдіруге бағытталған ұсыныстар пакетін дайындап, Мәдениет және ақпарат министрлігі мен Ішкі істер министрлігіне жолдаған.
Балалардың құқықтарын қорғау комитеті ата-аналарға мынадай кеңес береді:
-
Баланың қандай контент көріп жүргенін және кімдермен байланыс орнатып отырғанын бақылау;
-
Ашық диалог жүргізіп, баланың сыни ойлауын дамыту;
-
Күмәнді видеоларды анықтаған жағдайда дереу құзырлы органдарға хабарлау.
- Саналы ата-ананың белсенді араласуы - баланың цифрлық қауіпсіздігінің басты кепілі, - деп атап өтті комитет.
