Қазақстанда осы жылдың 10 айында сібір жарасын жұқтырудың саны өткен жылдың сәйкес кезеңімен салыстырғанда екі есе төмендеді. Бұл туралы Денсаулық сақтау министрлігі мәлімдеді, деп хабарлайды inbusiness.kz сайты.
Сібір жарасы – аса қауіпті инфекциялық аурудың бірі. Инфекция ауру малдан, оның етін пайдаланудан жұғады.
"Аурудың инкубациялық кезеңі бірнеше сағаттан 14 күнге дейін, бірақ көбінесе симптомдар инфекциядан кейін 3-6 күннен кейін пайда болады. Оларға жалпы әлсіздік, жоғары температура, лимфа түйіндерінің ісінуі және жүрек соғуының жоғарылауы жатады. Адам сібір жарасын ауру малдан жұқтыруы мүмкін, оларға ірі қара мал, жылқы, есек, қой, ешкі, бұғы, түйе кіреді", – делінген хабарламада.
Министрліктің жазуынша, ет және ет өнімдерін санитариялық-ветеринариялық бақылау жоқ белгісіз жерлерде сауда жасайтын жеке тұлғалардан сатып алуға болмайды. Базарларда ет сатып алу кезінде өнімнің қауіпсіздігін растайтын "ветеринариялық қорытынды" талап еткен жөн.
