Су ресурстары және ирригация министрлігі "ҚазСуШар" мекемесінің ирригациялық жобалары үшін Ислам Даму банкінен 2,7 млрд доллар көлемінде қарыз тартуды көздеп отыр.
– Қарыз бірнеше кезең бойынша бөлінеді. Бірінші кезең аясында жақын арада келісімшартқа қол қоямыз. Мемлекет кепілдігі рәсімделгеннен кейін "ҚазСуШар" мекемесіне 500 млн доллар көлемінде қаражат бөлінеді. Бұл қаржыға 4 жаңа су қоймасы салынып, қолданыстағы 4 су қоймасы күрделі жөндеуден өтеді. Сонымен қатар, жалпы ұзындығы 3 мың шақырымды құрайтын 156 ирригациялық жүйе қайта жөнделеді, – деді министр.
Егер бірінші кезең сәтті жүзеге асса, жобаның келесі кезеңдері бойынша да қосымша қаржы тарту жоспарланып отыр.
– Жалпы алғанда, Ислам Даму банкінен 2,7 млрд доллар қарыз алу жоспарда бар. Дегенмен бұл әлі келісу кезеңінде. Қаражаттың барлығы тозған ирригациялық жүйені жаңғыртуға және су қоймаларын реттеуге бағытталады, – деп түсіндірді Нұржігітов.
Сонымен қатар, министр Еуропа қайта құру және даму банкінен алынған қарыздың игерілу барысы туралы да айтып өтті.
– 2017 жылдан бері бұл банктен алынған 60 млрд теңгенің 55%-ы игерілді. Қалған 45%-ын 2025-2026 жылдары толық пайдалануды жоспарлап отырмыз. Бұл қарызды "ҚазСуШар" мекемесі тариф есебінен өтеуде. Қаражат Ақтөбе, Жамбыл, Түркістан облыстарындағы ирригациялық жүйелерді жаңғырту мен бетондауға жұмсалып жатыр, – деді ведомство басшысы.
