Үкімет отырысында қаржы министрі Ерұлан Жамаубаев жылда қайталанатын мәселе жайлы мәлімдеме жасады. Ол бюджет қаражатын игере алмай жатқан министрліктер мен әкімдіктердің атын атап, түсін түстеді.
"Мемлекеттік бюджет шығыстары – 97,9%, республикалық – 98,9%, жергілікті бюджеттер – 97,2% атқарылды. Республикалық бюджеттің шығыстары есептік кезеңде 5 трлн 620 млрд теңгені құрады. Бюджет қаражаты 61 млрд теңгеге атқарылмады. Оның 15 млрд теңгесі үнемдеу болды. Игерілмеген сома – 46 млрд теңге. Бюджет қаражатын игере алмай жатқан мемлекеттік органдар: Ұлттық экономика министрлігі – 7,3 млрд, Ішкі істер министрлігі – 6,4 млрд, Денсаулық сақтау министрлігі – 4,8 млрд, Жоғарғы сот – 4,5 млрд теңге, Қорғаныс министрлігі – 4,2 млрд теңге", – деді Ерұлан Жамаубаев.
Министр қаржының игерілмеуіне конкурстық рәсімдердің ұзақ және дер кезінде өткізілмеуі себеп болды дегенді алға тартты.
"Жергілікті бюджеттердің шығыстары 2 трлн 606 млрд теңгені құрады. 75 млрд теңге орындалмады. Өңірлерге 2 трлн 317 млрд теңге нысаналы трансферт қарастырылған. Алдын ала деректер бойынша, оған 671 млрд теңге бөлінді. Оның 96% немесе 643 млрд теңгесі игерілді. Орындалмаған сома - 28 млрд теңге. Оның 8 млрд теңгесі – бюджет қаражатын үнемдеу болса, ал 20 млрд теңге – игерілмеді", – деді аржы министрі.
Оның дерегінше, Алматы қаласы – 3,4 млрд, Батыс Қазақстан – 2,7 млрд, Павлодар – 2,6 млрд, Қызылорда – 2,4 млрд, Қарағанды – 2 млрд, Маңғыстау – 1,6 млрд, Ақмола және Түркістан облыстары – 0,9 млрд, Нұр-Сұлтан қаласы және Алматы облысы – 0,8 млрд теңге бюджет қаражатын ұқсата алмаған.
Қанат Махамбет
