Еңбек және халықты әлеуметтік қорғау министрлігінің мәліметінше, биыл қарашадан бастап "Қазақстанның кейбір заңнамалық актілеріне азаматтардың жекелеген санаттарын әлеуметтік қорғау мәселелері бойынша өзгерістер мен толықтырулар енгізу туралы" заңның 7 жастан бастап балаларға мүгедектік топтарын белгілеуді көздейтін нормасы қолданысқа енгізілді.
"Заң күшіне енгізілген күні (2021 жылғы 24 қазан) 7 жастан 16 аралығындағы жасқа толған мүгедектігі бар балаларға мүгедектік тобын белгілеуді медициналық-әлеуметтік сараптама (МӘС) бөлімдері МӘС актісінде бар деректер және бұрын "мүгедек бала" санаты бойынша белгіленген мүгедектік кезеңіне сырттай шығарылған сараптамалық қорытынды бойынша бір рет автоматтандырылған тәртіппен жүзеге асырылады", – деп жазылған хабарламада.
Осылайша, балалары 7 жасқа толған және одан асқан ата-аналарға (заңды өкілдерге) мүгедектік тобын белгілеу үшін МӘС бөлімдеріне барудың керегі жоқ.
"Бұл шара көрсетілетін оңалту іс-шаралары мен әлеуметтік көмекті, оның ішінде балалар ауруының ауырлық дәрежесіне қарай жәрдемақылар мөлшері бойынша саралауға мүмкіндік береді", – деп жазылған хабарламада.
Айта кетейік, осыған дейін мүгедек балалардың барлық тобы үшін жәрдемақы мөлшері 16,7%-дан 37%-ға дейін өскен еді. Бұл жағдай мүгедектігі бар 30 мыңнан аса балаға қатысты.
