Министрдің орынбасары орталық биыл жұмыс істей бастайтынын жеткізді.
"2021 жылы ақпанда орталық Әділет органдарында тіркелді, ал сәуірде Теңіз, Қашаған, Қарашығанақ кен орындарының 3 операторы қауымдастыққа мүше болды. Қазіргі таңда орталықты іске қосу, кеңсе ашу, басқа да тиісті саясат пен қажетті рәсімдерді әзірлеу сияқты жұмыстар жүргізіліп жатыр",– деді Жұмабай Қарағаев.
Вице-министр мұнай-газ машина жасау орталығына қаржы қалай бөлінетінін түсіндірді.
"Орталықтың қызметін жоғарыдағы 3 оператор қаржыландырады. Олар арнайы бюджетті белгілеген. Осылайша, орталық жұмыс істейді, оның барлық шығынына аудит жүргізіледі", – деді вице-министр.
Сондай-ақ жаңа орталық мұнай-газ саласындағы импорттық құрал-жабдықтар санын қысқартып, отандық өнімнің үлесін арттыруға мүмкіндік беретінін атап өтті.
Айта кетейік, өткен жылы елімізде мұнай-газ машинасын жасау орталығының құрылатыны хабарланған еді.
