Теңіз кенішінде 6,5 мың мұнайшы "Спутник V" екпесін алмақ. Қазіргі күні ТШО компаниясында 1 мың адам егілген, деп жазды inbusiness.kz тілшісі.
Бұған дейін республикалық БАҚ-тарда Қазақстан мұнай-сервис компаниялары одағының төралқа төрағасы Рашид Жақсылықовтың мұнайшылардың 90 пайызы екпеден бас тартып жатқанын жөніндегі мәлімдемесі тараған болатын. Онда төралқа төрағасы: "Теңіз кенішіндегі мұндай жағдай зауыт құрылысын тежеуі мүмкін. Бас тартудың бір себебі – еңбек заңдылығы бойынша вахталық қызметкерлердің жалақысына қосымша үстемақы төленеді. Ал олар вакцина қабылдағаннан кейін оқшаулануы тиіс, бұл олардың еңбекақысына әсер етеді", - деп түсіндірген еді.
"Біз екпе жұмыстары бойынша түсіндіру жұмыстарын жүргізіп жатырмыз. Басқа облыстың тұрғындары өздерінің тұрғылықты мекен-жайлары бойынша егілді.
"Спутник V" вакцинасының екі құрамын алған жұмысшыларға да оқшауланудың қажеті жоқ", - дейді "Теңізшевройл" ЖШС үкіметпен және жұртшылықпен байланыс жөніндегі бас менеджері Рзабек Артығалиев.
Белгілі болғандай, 9 сәуір күні облыстық денсаулық сақтау басқармасы ТШО-ның мердігер және субмердігер компанияларына "Спутник V" вакцинасының 4 мың дозасын бөлген. Атырау қаласы мен Теңіз кен орнында екі екпе егетін орын ашылған. Сондай-ақ, Теңіз кенішінде короновирус дертін жұқтырғандар санының азайғаны байқалуда екен. Мәселен, соңғы тәуліктер бойынша оны үш адам жұқтырғаны анықталыпты.
Құралай Қуатова
