Дзюдодан Рио олимпиадасының, әлем чемпионатының қола жүлдегері Отгонцецег Галбадрах, еркін күрестен әлем чемпионатының күміс жүлдегері Дәулет Ниязбеков, танымал дзюдошы Елдос Жұмақанов, Лондон олимпиадасында 5-орынға тұрақтаған балуан Ғалымжан Өсербаев осы жылы спортпен қош айтысты. "Үлкен дулыға" турнирлерінің финалисі Ярослава Шведова да биыл спорттағы ғұмырына нүкте қойды. Ал жаңа жыл қарсаңында даңқты боксшы Василий Левит өзінің спорттан қол үзетінін мәлімдеді.
Өкінішке қарай, жыл басында белгілі шаңғышы, әлем чемпионатының қола жүлдегері Николай Чеботько жол апатынан қаза тапты. Өтіп бара жатқан жылда спорт бапкері және функционері Темірхан Досмұхамедов, Вячеслав Шапран (волейбол), Фанас Салимов (футбол), Альберт Линдер (ауыр атлетика), белгілі спорт комментаторы Аманкелді Сейітхан, Евгений Пупков (хоккей), Қазбек Әшляев (бокс бапкері), Станислав Лунин (футбол) сияқты тұлғалар бақилық болды.
