Бірқатар қазақстандық бұқаралық ақпарат құралы нан бағасын тұрақтандыру үшін Үкімет резервінен 2,6 млрд теңге бөлінді деген ақпарат жариялаған. Мұны Ауыл шаруашылығы министрлігі жоққа шығарды, деп хабарлады inbusiness.kz порталы ведомствоның баспасөз қызметіне сілтеме жасап.
Жаңалықтарда бұл ақпарат іске асырылған факт ретінде ұсынылған.
Осыған байланысты Ауыл шаруашылығы министрлігі тиісті қаулы жобасына қатысты түсініктеме берді.
"Мұндай жобаны министрліктің әзірлегені рас және қазіргі уақытта талқылау процедурасынан өтуде. Яғни, жоба қабылданған жоқ. Әзірге кеңінен талқылау үшін ғана ұсынылды. Бұл жоба 2021 жылдың 11 наурызы күні ҚР Үкіметінің отырысында мақұлданған әлеуметтік маңызы бар азық-түлік тауарларының бағасын тұрақтандыру жөніндегі Жол картасын іске асыру мақсатында әзірленді.
Айта кету керек, астық тапшылығы туралы мәселе жоқ. Жоғарыда айтылғандай, 2020 жылғы өнім елді астықпен толық қамтамасыз етуге және белгілі бір бөлігін экспортқа шығару да жетеді. Тағы бір мәселе – астық бағасы. Дәстүрлі түрде астықтың ішкі нарықтағы құны экспорттық бағаларға байланысты қалыптасады. Қазір экспорттық нарықтарда астыққа деген сұраныс артып отыр. Бұқаралық ақпарат құралдары бұл жөнінде дұрыс жазған. Биылғы астықты жинағанға дейін әлі бес ай барын ескергенмен, қазіргі уақытта ішкі нарықтағы астық бағасы тұрақты", - дер жазылған хабарламада.
Дегенмен, мамандар алдағы уақытта сыртқы және ішкі нарықта бағаның өсетінін жоққа шығармайды.
"Қазақстан осындай жағдайларға дайын болуы керек және "әлеуметтік нан" бағасын тұрақтандыру шараларын осы бастан қолға алуы тиіс. Ұн бағасы көтерілген жағдайда наубайханаларға әлеуметтік маңызы бар өнімдердің бағасын ұстап тұру қиын болатынын түсінуі керек. Ол үшін тасымалдау шығындарын өтеу сияқты шаралар қажет. Бұл жерде астық егетін өңірлерден шалғай облыстар туралы сөз болып отыр. Мысалы Алматы, Жамбыл және Түркістан облыстарында бидай өсірілгенмен, оның ұны нан пісіруге келе бермейді. Сондықтан, осы аймақтардағы жеке өндірістер халықтың нанға деген қажеттілігін қамтамасыз ете алмайды", - деп хабарлады министрлік.
Сондай-ақ, Ауыл шаруашылығы министрлігі нормативтік құқықтық актілерді келісу және қабылдау процедураларына едәуір уақыт кететінін, тек "Ашық нормативтік құқықтық акт" порталында талқылау кем дегенде 11 күнтізбелік күн бойы өткізілуі тиіс екенін хабарлады. Сондықтан мұндай жұмыс алдын-ала жүргізіледі.
"Ішкі нарықта астық бағасы едәуір көтерілген жағдайда Үкімет әлеуметтік маңызы бар азық-түлік тауарларының бағасын тұрақтандыру бойынша, соның ішінде батыс және оңтүстік өңірлерге астық тасымалдау шығындарын өтеу механизмі ретінде жедел шаралар қабылдайтын болады", - делінген министрліктің хабарламасында.
