/img/tv1.svg
RU KZ
Нарықты монополистерден тазалау керек – Қасым-Жомарт Тоқаев

Нарықты монополистерден тазалау керек – Қасым-Жомарт Тоқаев

Мемлекет басшысы Қасым-Жомарт Тоқаев Алматыда жеңіл автомобильдер шығаратын қазақстандық «Hyundai Trans Kazakhstan» зауытының іске қосылуға дайындығын тексерді.  

25 Қыркүйек 2020 18:58 373

Нарықты монополистерден тазалау керек – Қасым-Жомарт Тоқаев

Президент автомашиналарды құрастыру процесімен танысып, 2020 жылғы 15 қазанда ашылады деп жоспарланып отырған ұсақторапты құрастыру әдісімен автомобильдер шығаруға арналған жаңа цехты аралап көрді, деп хабарлайды Ақорда.
Мемлекет басшысына жобаның Алматы қаласының индустриялық аймағындағы мемлекеттік құрылымдардың қолдауымен жүзеге асырылып жатқаны туралы баяндалды. Кәсіпорын пайдалануға берілгеннен кейін оның қуаты бірінші кезеңде жылына 30 мың, екінші кезеңде 45 мыңға дейін машина жасауға жетеді.

Инвестицияның жалпы көлемі – 28 миллиард теңгеден астам, оның 30% – компанияның өз қаражаты. Hyundai Trans Kazakhstan кәсіпорны 700-ге жуық жұмыс орнын ашып, сабақтас салалардың дамуына серпін береді. Инвесторлар келешекте автобөлшектер шығаратын зауыт салуды жоспарлап отыр. Осылайша компания отандық автокөлік өнеркәсібін дамыту жөніндегі көздеген мақсаттарына қол жеткізеді. Бұл отандық өндірістің 51 % астамын қамтамасыз етеді.

Мемлекет басшысы нысанды аралап көргеннен кейін индустриялық аймақ резиденттерімен жеке кәсіпкерлікті қолдау және кәсіпорынның басым салаларын дамыту мәселелерін талқылады.

«Мен өз Жолдауымда еліміздегі кәсіпкерлікті дамытуға ерекше мән бердім. Әсіресе, бизнестің, кәсіпкерліктің дамуына мемлекеттік органдар тарапынан келтірілетін кез келген кедергі елімізге қарсы жасалған қылмыс ретінде қаралатынына арнайы тоқталдым. Яғни, басқаша айтқанда, Үкімет, жергілікті атқарушы органдар кәсіпкерлікті дамытуға жан-жақты қолдау көрсетуге тиіс. Бұл – экономикалық саясатымыздағы негізгі бағыт», – деді Президент. Қасым-Жомарт Тоқаев еліміздің экономикасындағы ахуал пандемия салдарынан әлі де күрделі екенін және бұл дағдарыстан мемлекет пен бизнестің бірлескен күш-жігерінің арқасында ғана шығуға болатынын атап өтті.

Бәсекелестікті қорғау үшін Стратегиялық жоспарлау және реформалар агенттігі құрылды.

«Нарықты монополистерден тазалау керек. Барлық лайықты кәсіпкерлердің біздің нарыққа еніп, еркін жұмыс істеуіне мүмкіндік беру қажет. Сонда ғана экономика еркін дами алады. Мұның бәрі жаңа ұйымдастыру шараларын қабылдауды талап ететіні сөзсіз. Бұл шаралардың бәрі тиімді болады деп үміттенемін», – деді Мемлекет басшысы.

Президент экономикалық шаралармен қатар мемлекет тарапынан Қазақстан қоғамын одан әрі демократияландыру жөнінде де шаралар қабылданатынын айтты. Тұңғыш Президент – Елбасы Нұрсұлтан Назарбаев мемлекетті қалыптастыруға көп еңбек сіңірді. Ендігі міндет Қазақстанның дамуына тың серпін беру болып табылады.

«Партиялардың қызметіне, бейбіт жиындар мен шерулер өткізуге қатысты жаңа заңдар қабылданды. Жуырда ғана Қазақстанда өлім жазасынан бас тартуды қарастыратын екінші факультативті хаттамаға қосылу жөнінде шешім қабылданды. Кезінде Тұңғыш Президентіміз тарапынан өлім жазасына жарияланған мораторий күшінде болғандықтан, бұл шешім Конституцияға толық сай келеді және Атазаңға ешқандай өзгеріс енгізу қажет емес. Шын мәнінде, елімізде өлім жазасы жоқ. Тек Конституцияда қарастырылған екі ғана болмашы ерекшелік бар. Олар факультативті хаттаманың талабына толық сай келеді. Сондықтан екі бірдей міндет: еліміздің экономикасын жаңа жағдайда дамыту, Қазақстан үшін тиімді интеграциялық процестерді күшейту және саяси реформаларды жүзеге асыру. Бұл міндеттердің бәрі бір уақытта атқарылады және табысты болады деп үміттенемін», – деді Қасым-Жомарт Тоқаев.

Бизнес өкілдері Жолдауда айтылған шараларға оң баға беріп, кәсіпкерлікке қолдау көрсеткені үшін Президентке алғыс білдірді. Сонымен қатар олар тірі малды экспортқа шығаруға жарияланған мораторийді созу жөнінде Мемлекет басшысына өтініш жасады.

 

Мемлекет басшысы Канаданың Премьер-Министрімен кездесу өткізді

Кездесу соңында Қасым-Жомарт Тоқаев пен Джастин Трюдо бір-бірін өзара сапар алмасуға шақырды.  

14 Ақпан 2020 20:57 634

Қасым-Жомарт Тоқаев 56-шы қауіпсіздік жөніндегі Мюнхен конференциясы аясында өткізген екіжақты кездесулерін Канаданың Премьер-Министрі Джастин Трюдомен келіссөз жүргізуден бастады, деп хабарлайды Ақорда.

Тараптар Қазақстан мен Канада арасындағы сауда-экономикалық, инвестициялық және мәдени-гуманитарлық ынтымақтастықтың қазіргі ахуалы мен перспективаларын талқылап, халықаралық ұйымдар аясындағы ықпалдастықты қарастырды, сондай-ақ, халықаралық күн тәртібіндегі өзекті мәселелер бойынша пікір алмасты.

Қасым-Жомарт Тоқаев Джастин Трюдоға ілтипат білдіріп, экономика, инвестиция тарту, ауыл шаруашылығы және технология салаларындағы екіжақты қатынастарды одан әрі дамытудың маңыздылығын атап өтті.

«Біз Канадамен тығыз қарым-қатынас орнаттық. Ынтымақтастығымыздың қазіргі деңгейін жоғары бағалаймыз. Елдеріміз арасындағы өзара ықпалдастықтың аясын одан әрі кеңейте түсеміз деп үміттенеміз», – деді Қазақстан Президенті.

Мемлекет басшысы уран саласындағы канадалық «Cameco» компаниясының жұмысына оң баға беріп, Канада бизнесіне қажетті барлық жағдайды жасауды жалғастыра беруге дайын екенін растады.

Джастин Трюдо кездесуге мүмкіндік туғызғаны үшін Қазақстан Президентіне алғыс білдіріп, екі мемлекет арасындағы көпжылдық достық пен серіктестікке тоқталды.

«Екі ел арасындағы экономикалық ынтымақтастықта көптеген ортақтық бар. Біз энергетика саласындағы бірқатар жоба бойынша ықпалдастық орнаттық. Кооперацияларымызды одан әрі нығайтуға ниеттіміз», – деді Канаданың Премьер-Министрі.

Канада үкіметінің басшысы саяси және экономикалық реформаларды жүзеге асыру жөніндегі Қазақстан Президентінің күш-жігерін жоғары бағалап, азаматтық қоғам мен демократияны дамыту саласына қолдау көрсетуге дайын екенін жеткізді.

 

Президент Қордайдағы жаппай төбелеске пікір білдірді

Бұл туралы Мемлекет басшысы Твиттер желісінде жариялады.   

08 Ақпан 2020 00:01 729

Мемлекет басшысы Қордайдағы жаппай төбелеске пікір білдірді, деп хабарлайды inbusiness.kz. 

«Жамбыл облысы Қордай ауданында бұзақылық сипаттағы жаппай төбелес болды. Оны арандатушылар өз пайдасына қолданбақ болған. Полиция жағдайды реттеп, өз бақылауына алды. Қоғамдық тәртіпті бұзғандар жауапкершілікке тартылады», – деп жазды Қасым-Жомарт Тоқаев Твиттер желісінде.