2018 жылдың 14 қараша күні Astana International Exchange (AIX) – "Астана" халықаралық қаржы орталығының биржасында мемлекет басшысының қатысуымен сауда-саттықтың іске қосылуына орай салтанатты шара өтті.
Биржаға алғаш болып IPO-сын шығарған бірінші эмитент – "Қазатомөнеркәсіп" АҚ. Одан бөлек биржада ҚР қаржы министрлігі мен "Қазақтелеком" АҚ облигацияларын орналастырған.
Биржаны сауда-саттықтың іске қосылуымен оның акционерлерінің бірі - әлем бойынша биржалық алпауыт Nasdaq құттықтады. Ол Биржаға өзінің Nasdaq Matching Engine атты технологиялық платформасын ұсынған. Арнайы құттықтау хабарламасы Нью-Йорктің Таймс-скверіндегі танымал Nasdaq бейнеқабырғасында жарияланды.
AIX акционерлері қатарында Nasdaq-тан бөлек, Шанхай қор биржасы (SSE), ҚХР үкіметінің "Белдеу мен жол" бастамасы бойынша жұмыс істейтін "Жібек жолы қоры", сонымен қатар Goldman Sachs International бар.
