Тәуелсіздік жылдары Қазақстанға барлығы 670 млрд доллардан астам қаржы тартылды.
"Елдер бөлінісінде ең көп Инвестициялар Нидерландтан тартылады (бірінші жартыжылдықта үлесі – 29,6%, екінші орында АҚШ – 18,8%, одан кейін Швейцария, Ресей Федерациясы, Ұлыбритания келеді", – деді СІМ Инвестициялар комитеті төрағасының орынбасары Ерлан Зейнешев.
Тағы бір ірі инвестор – БАӘ. Олардан шамамен 6 миллиард доллар тарту туралы декларацияға қол қойылды.
"БАӘ – біздің стратегиялық инвестициялық серіктесіміз. Олар құрылыс, қаржы, білім беру, туризм, энергетика сияқты түрлі салаларда айтарлықтай инвестициялық мүмкіндіктер мен құзыреттерге ие. БАӘ Қазақстандағы ең ірі жиырма инвестордың қатарына кіреді", – деді Ұлттық экономика вице-министрі Әлішер Әбдіқадыров.
Бізден кетіп қалған инвесторлар да бар. Олар қиындықтармен бетпе-бет келген. Атап айтсақ: инфрақұрылымның дамымағандығы, кедендік және салықтық әкімшілендіру мәселелері, көші-қон және визалық мәселелер қиындық туғызады.
"Бізде диалог алаңдары бар. Көптеген мәселе инвестициялық штаб, инвестициялық омбудсмен деңгейіне шығарылады. Инвесторларды ұстап қалу үшін шешім табуға тырысамыз", – деп атап өтті Ерлан Зейнешев.
