Норвегия үкіметі елдегі компанияларына Украинаға қару-жарақ пен қорғаныс өнімдерін тікелей сатуға рұқсат берді, деп жазады inbusiness.kz сайты үкіметтің баспасөз хабарламасына сілтеме жасап.
Билік бұл шешімді Украинаға жеткізу ресурстарының шектеулі жағдайында одан әрі қолдау көрсету қажеттілігімен түсіндірді. Енді норвегиялық қорғаныс компаниялары қаруды экспортқа және тікелей сатуға лицензия алу үшін Сыртқы істер министрлігіне жүгіне алады.
Лицензиялар келесі тармақтардың орындалуын тексергеннен кейін беріледі: тек Украина билігіне сату, түпкілікті пайдалану кепілдігі және қауіпсіз тасымалдау бағыты.
2022 жылдың ақпанында арнайы операция басталғаннан кейін Норвегия Ресейдің әрекетін айыптап, Украинаға қаржылық және әскери көмек көрсететін елдерге қосылды. Дегенмен, норвегиялық қару өндірушілерге соғыс қимылдары жүріп жатқан елдерге қаруды тікелей жеткізу туралы келісімдерге отыруға тыйым салынды. Украинаға жеткізілімдерді қоспағанда, шектеу әлі де күшін жойған жоқ.
