Вахдат қаласы мен Тәжікстанның Рудаки ауданында нөсер жаңбырдан 13 адам қаза тапты, деп хабарлайды Inbusiness.kz республика президентінің баспасөз қызметіне сілтеме жасап.
"Кеше Вахдат пен Рудаки аймағында нөсер жаңбырдың салдарынан табиғи апат орын алып, 13 адам қаза тапты, оның ішінде Вахдатта 11 адам және Рудаки аймағында 2 адам қаза тапты", — делінген хабарламада.
Тәжікстан басшысы Эмомали Рахмон қаза тапқандардың отбасылары мен жақындарына көңіл айтып, Премьер-министрге, Төтенше жағдайлар және азаматтық қорғаныс комитетіне, басқа да тиісті құрылымдар мен органдарға оларға, сондай-ақ апаттан зардап шеккендердің барлығына жан-жақты көмек көрсетуді, апаттың салдарын жою бойынша шұғыл шаралар қабылдауды тапсырды.
Нөсер жаңбыр республикалық маңызы бар автомобиль жолдарына зақым келтіргені хабарланды. Кейбір жерлерде сел байқалды.
