Нұр-Сұлтан қаласы әкімінің орынбасары Бақтияр Мәкен білім беру ұйымдарының басшыларымен кеңес өткізіп, оның аясында жаңа оқу жылында бірінші сыныпқа қабылдау, қорытынды аттестаттау, ҰБТ өткізу тәртібі, сондай-ақ кадрлық қамтамасыз ету жөнінде түсініктеме берілді, деп хабарлайды елорда әкімдігінің ресми сайты.
Кеңес барысында қалалық білім басқармасының басшысы Шолпан Қадырова қашықтан оқыту кезінде қорытынды аттестаттау қалай жүргізілетінін айтты.
"9 -(10) сынып оқушылары үшін бітіру емтихандары мен 11-(12) сынып оқушыларының мемлекеттік емтихандары тоқтатылды. Қорытынды бағалар жылдық бағалар негізінде қойылады. Сондай-ақ IV тоқсанда бөлім үшін жиынтық бағалау бір рет (4-11 мамыр 2020 ж.) өтеді. Тоқсан бойынша жиынтық бағалау бір рет (18-22 мамыр 2020 ж.) өтеді", – деп түсіндірді Ш.Қадырова.
Бұл ретте Ұлттық бірыңғай тестілеуді (ҰБТ) өткізу форматы өзгермейді.
"Биыл түлектер ҰБТ-ны 11-сыныптың төртінші тоқсанының бағдарламасындағы сұрақтарсыз тапсырады (яғни 5-ші сыныптан 11-сыныптың үш тоқсанына дейін). Тестіленушілер арасындағы қашықтық ұлғайтылады. Сонымен қатар, барлық оқушылардың температурасын жергілікті жерлерде тексеретін болады. Қосымша санитарлық шектеу шаралары қабылданады", – деді ол.
Мектеп түлектерінің ҰБТ-ға қатысуға онлайн-өтінім беруі 1 сәуірден 10 мамырға дейін жүргізіледі. Елорда әкімінің орынбасары Бақтияр Мәкен шектеу шаралары бойынша оқушылар арасында түсіндіру жұмыстарын жүргізуді және оқу жылын табысты аяқтау үшін қажетті шаралар қабылдауды тапсырды.
