Нұр-Сұлтан қаласы қоғамдық денсаулық сақтау басқармасының басшысы Сәуле Қисықова коронавирус пандемиясына қатысты 26 наурыз сағат 18:00-дегі жағдай бойынша мәлімдеме жасады.
Басқарма басшысының баяндауынша, 1156 науқас стационарлық ем қабылдап жатыр. Оның 80-і жас бала.
"Нұр-Сұлтан қаласында 61 адамнан коронавирус инфекциясы анықталды. Бүгінгі таңда тиісті медициналық шаралар қолданылып жатыр", – деді Сәуле Қисықова.
Оның сөзінше, шет мемлекеттен 18 чартерлік рейспен келген 1 483 жолаушы тексеріліп, олардан биоматериал алынған.
"Шетелден келген жолаушыларды тексеру барысында 3 адамнан коронавирус инфекциясы анықталды. Науқастар бірден ауруханаға жөнелтілді. Олармен қарым-қатынаста болған адамдар оқшауланды", – деді басқарма басшысы.
Қанат Махамбет
