Нұр-Сұлтан қаласында "Тіл тазалығы – баршаға ортақ іс" атты жалпықалалық акция өтуде, деп хабарлайды елорда әкімдігінің ресми сайты.
Бүгін қалалық әкімдікте өткен отырыс барысында қала әкімінің орынбасары Ерлан Каналимов жыл басынан қалада 800-ге жуық заңсыз жарнама алынғанын айтты.
"Қазір әр аудан бойынша жұмыс тобын құрдық. Арнайы график бекітіп, әр күні әр ауданда заңсыз жарнамаларды алуды бастадық. Жалпы қалада "Тіл тазалығы – баршаға ортақ іс" акциясы жүріп жатыр. Шара аясында 250-ден аса нысанда заңдық консультация берілді. Жақында ғана Тәуелсіздік даңғылы бойында 200 метрден асатын билбордты алдырып тастадық. Жыл басынан жұмыс топтары "Алматы" ауданында – 137, "Байқоныр" ауданында – 400-ден аса, "Есіл" ауданында – 15, "Сарыарқа" ауданында 247 заңсыз жарнама алынып тасталды. Жұмыстар жалғасып жатыр",– деді ол.
