Диспансерлік есепте тұрған егде жастағы азаматтарға 25 наурыздан бастап қажетті дәрі-дәрмек өнімдері үйлеріне жеткізілуде, деп хабарлайды елорда әкімдігінің ресми сайты.
Дәрігерлердің айтуынша, таратылған дәрілік өнімдердің басым бөлігі қант диабеті, артериялық қан қысымы мен ишемиялық жүрек ауруларына арналған.
Дәрі-дәрмектерді астаналық медицина мамандары мен волонтерлер жеткізуде.
"Біз бүгін дәрі-дәрмекті қажет ететін пациенттерге дәрілік препараттарды тарататын боламыз. Бізге елордалық вонтерлер мен медбикелер көмектеседі. Бұл шара олардың емхана келмей, үйден көмек алуына мүмкіндік жасау. Біздің емханада 6 мың адам – егде жастағы азаматтар. Карантин кезінде пациенттің дер кезінде дәріні алуы өзекті мәселе боп саналады", – деді №10 емханасының терапия бөлімінің меңгерушісі Гүлназ Бекенова.
Қоғамдық орындарға бару қауіпті саналған уақытта қажетті дәрі-дәрмек көлемін үйге жеткізу қызметін іске қосқаны үшін елордалық зейнеткерлер қала әкімдігіне алғыстарын білдірді.
Дәрі-дәрмекті үйге алу үшін егде жастағы азаматтар өтінім жолдауы қажет. Өтінімде тұрғынның аты-жөні, ЖСН, мекен-жайы, байланыс нөмірі, дәрілердің тізімі, қалалық емхананың нөмірі мен дәрігердің деректері көрсетілуге тиіс.
Өтінімді келесі тетіктер арқылы жолдауға болады: iKomek орталығының 109 нөмірі бойынша; iKomek орталығының 109 мобильді қосымшасы арқылы; Telegram чат-боты (t.me/nursultanikomek109_bot) арқылы; Smart Astana, aitu.city порталы арқылы.
