Елорда әкімі Алтай Көлгінов үкімет отырысында КВИ бойынша баяндама жасады.
"Қатаң карантин енгізу нәтижесінде қазіргі күні жағдайдың тұрақтанғаны байқалады. Коронавирус инфекциясын жұқтырғандардың саны 8 619 адамды құрады. 5511 адам немесе науқастардың 64% емделіп шықты. Өкінішке қарай, 212 адам қайтыс болды. 262 адам стационарда ем алып жатыр. Ауыр халдегі науқастардың саны 30% азайды. Инфекциялық және стационарлық провизорларда төсек-орын саны артты", – деді Алтай Көлгінов.
Әкімнің сөзінше, елордада күні бүгінге дейін 260 мыңнан астам ПТР-тест жасалды.
"Жедел жәрдем стансасының базасында науқастардың ағымын біркелкі бөлу үшін ахуал орталығы ұйымдастырылды. Жедел жәрдем бригадаларының саны 110-нан 160-қа дейін артты. Сонымен қатар медициналық колледждерден 275 жас маман емханаларға жұмысқа орналастырылды. Медициналық университеттен 300 студент жұмылдырылды", – деді шаһар басшысы.
Алтай Көлгіновтің айтуынша, КВИ жағдайының тұрақталуы байқалып жатыр. Жедел жәрдемге жүгіну саны тәулігіне 4300-ден 2 мыңға, шақыру саны тәулігіне 3 мыңнан 1400-ге азайды.
Қанат Махамбет
