Павлодардың қылмыстық істер жөніндегі мамандандырылған ауданаралық сотында алқабилер Павлодар облысы полиция департаментінің бұрынғы басшысы Нұрлан Мәсімовке, оның экс-орынбасары Дамир Сиразидимов пен кәсіпкер Евгений Евковичке қатысты айыптау үкімін шығарды, деп хабарлайды inbusiness.kz.
"Сотталушылар М. және С., ҚК 366, 368, 189-баптары бойынша кінәларын мойындамады және ақтауды сұрады. Е., өз кінәсін толық мойындады. Алқабилердің қатысуымен сот кесімі бойынша сотталушылар өздеріне тағылған қылмыстық әрекеттерді жасағаны үшін кінәлі деп танылды. М.-ға қылмыстардың жиынтығы бойынша мүлкін тәркілеумен, мемлекеттік қызметте лауазымдарды атқару құқығынан өмір бойына айыра отырып, 10 жыл мерзімге бас бостандығынан айыру жазасы тағайындалды. C.-ға қылмыстардың жиынтығы бойынша мемлекеттік қызметте лауазымдарды атқару құқығынан өмір бойына айыра отырып, 8 жыл мерзімге бас бостандығынан айрылды. Е.-ге мүлкін тәркілеумен, 7 жыл мерзімге коммерциялық ұйымдарда басшылық қызметін атқару құқығынан айыра отырып, 10 жыл мерзімге бас бостандығынан айыруды тағайындады", дейді Павлодар сотынан.
Сондай-ақ, сот М.-ды мемлекеттік наградасынан және генерал-майор атағынан, ал С.-ны - полковник арнайы атағынан айыру туралы ұсыныс жасады.
Сот үкімі заңды күшіне енген жоқ.
Еске салайық, былтыр сәуірде Нұрлан Мәсімовке іздеу жарияланған. Кейін шілдеде оның Ресеймен шекарада ұсталғаны хабарланды.
