Нұрсұлтан Назарбаев "Nur Otan" партиясы Төрағасының бірінші орынбасары Бауыржан Байбекті қабылдады.
"Праймериздің сапалы өтуін қамтамасыз ету және халыққа оның мақсаттары туралы түсіндіру маңызды. Бұл Мәжіліс пен мәслихаттар сайлауына қатысу үшін белсенді, сауатты және патриот партия мүшелерін іріктеуге мүмкіндік береді", – деді "Nur Otan" партиясының Төрағасы.
Бауыржан Байбек Нұрсұлтан Назарбаевқа партия мүшелері арасындағы іріктеуді ұйымдастыру бойынша дайындық жұмыстарының нәтижелері туралы айтып берді.
"Бүгін еліміздің барлық өңірінде праймериз басталды. Оған қатысу үшін жергілікті жерлерде 700-ден астам қоғам белсендісі партия қатарына қосылды", – деді "Nur Otan" партиясы Төрағасының бірінші орынбасары.
Сонымен қатар Б.Байбек "Nur Otan" партиясының Төрағасына сайлауалды бағдарламасын дайындау және "Birgemiz" қорының әлеуметтік жағдайы төмен азаматтар мен медициналық ұйымдардың қызметкерлерін қолдауға бағытталған жұмысы туралы баяндады. Сондай-ақ Елбасына су тасқынынан зардап шеккен Түркістан облысы Мақтаарал ауданындағы Достық ауылының тұрғындарына арналған үйлерді салу бойынша атқарылған жұмыстардың нәтижелері туралы ақпарат берілді.
"Nur Otan" партиясына келетін онлайн өтініштер саны бес есе артты. Осылайша, жеті ай ішінде 270 мың адам өтініш білдірді. Олардың 60 пайызы қаралып, шешімін тапты. Өзіңіз бастамашы болған "Birgemiz" қорының аясында 2,3 миллион қазақстандыққа қолдау көрсетілді. Мақтаарал ауданындағы су тасқынынан зардап шеккен ауыл тұрғындарына арналған 20 үйдің құрылысы аяқталуға жақын", – деді "Nur Otan" партиясы Төрағасының бірінші орынбасары.
