Қала мэрі Зохран Мамдани ант беру кезінде XVIII ғасырда Сирияда жазылған, Осман империясы дәуіріне тиесілі қолжазба Құранды пайдаланған. Салтанатты рәсім 1 қаңтар күні өтті.
Мамдани X әлеуметтік желісіндегі парақшасында бұл Құранның тарихи маңызына тоқталып, оның бұрын Артуро Шомбургтің жеке коллекциясында болғанын атап өтті. Қолжазба қара сиямен жазылып, кей тұстары қызыл түспен ерекшеленген.
Мэр аталған Құранды Нью-Йорк тарихындағы "жаңа кезеңнің белгісі" деп атап, оны қаланың барша тұрғындарына ортақ мәдени мұра ретінде бағалайтынын жеткізді. Қолжазба алдағы уақытта Нью-Йорк қоғамдық кітапханасы қорында көрмеге қойылады.
Айта кетейік, 34 жастағы Зохран Мамдани Угандада дүниеге келген. Ол 4 қарашада өткен сайлауда жеңіске жетіп, соңғы 100 жылдағы Нью-Йорктің ең жас мэрі әрі қаланың алғашқы мұсылман басшысы атанды.
CBS News мәліметінше, сайлауға 2 миллионнан астам адам қатысқан, бұл көрсеткіш 1969 жылдан бергі ең жоғары деңгей ретінде тіркелді.
