Оңтүстік Қазақстан облысының әкімі Жансейіт Түймебаев өңірдегі кинорежиссерлер мен анимация саласының мамандарымен кездесіп, "Ерлік" толықметражды фильмінің премьерасына қатысты, деп хабарлайды облыс әкімінің баспасөз қызметі.
Өнер майталмандарымен болған жүздесуде күнгейдегі кино мен анимация саласын дамыту жолдары талқыланып, алдағы жоспары айтылды.
Айта кетейік, елімізде кино индустриясы саласында Оңтүстік Қазақстан екінші орында болса, анимациялық фильм түсіруден көш басында. Сонымен қатар биыл қыркүйек айында Түркістан қаласында Түркі әлемінің "Алтын сақа" анимациялық фильмінің фестивалі өтеді. Бұл фестивальде аниматорлар түркі әлеміне ортақ әзілдерімен танылған Қожа Насреддин образы ұсынылады. Бүгінде облысымыздағы жеке киностудиялардың 40-тан аса кино туындысы мен 51 анимациялық фильмі көрерменге жол тартқан.
Шығармашылық өкілдерімен болған отырыста сөз бастаған өңір басшысы кино саласы қоғамның ұлттық идеологиясын қалыптастыратын үлкен құралдардың бірі екенін айтып, соңғы жылдары елімізде киноға және оның сапасына көңіл бөлініп келе жатқанын айтты.
Жиында кино саласының үздіктері де өз ойын ортаға салып, ұлттық идеологияны қалыптастырудағы жоспарымен бөлісті.
Сондай-ақ қаламгерлер бүгінде елімізде отандық киноны дамытуға мемлекеттен қолдау көрсетіліп жатқанын тілге тиек етіп, өңірде осы саланы дамытуды қолға алып, кинорежиссерлермен кездесіп отырған алғашқы әкім екенін жеткізді.
"Сізбен өткен кездесу шығармашылық ұжым жұмысына, жаңа идеяның тууына серпін береді. Біздің проблемамызға қанығып, қазақ индустриясының дамуы жайлы айтқан ой-пікіріңіз біз үшін маңызды", – деді "Сақ" киностудиясының директоры, режиссер Нуриддин Паттеев.
Бейресми кездесудің соңында Ұлыстың ұлы күні қарсаңында "Шымкент Плаза" ойын-сауық сауда орталығының кинозалында облыс әкімдігінің тапсырысымен түсірілген "Ерлік" толықметражды көркемсуретті фильмінің тұсаукесері өтті.
