ОҚО-да "Шатқал" бағдарламасы қолға алынғаннан бері бос жатқан сай-салаға көшеттер егіліп, саябаққа айналуда, деп хабарлайды ОҚО әкімінің баспасөз қызметі.
Биыл облыс орталығы Шымкент қаласындағы 7 шатқалда осы уақытқа дейін 55 мыңға жуық көшет отырғызылған. Сондай-ақ, шатқалдағы көшеттердің жайқалып өсуі үшін жыл басынан бері 17 ұңғыма қазылып, 26 су қоймасы жасалды. Сол арқылы 30 шақырымға жуық суғару жүйесі тартылған. Шатқалдарға 16 шақырым қоршау орнатылды.
Айта кетерлігі, Шымкент қаласындағы шатқалдардың жалпы аумағы 124 гектар жерді құрап отыр.
Қазіргі уақытта шатқалдарда тамшылатып суғару жүйесі орнатылған. Сондай-ақ, көшеттерді күтіп-баптау үшін әрбір шатқалда тұрақты мамандар жұмыс істейді. Жалпы егілген көшеттердің өнімділігі 75 пайызды құрайды. Оның арасында табиғи қурау процесі бар. Мамандардың айтуынша, бұл жоғары өнімділікті көрсетеді.
Қазіргі таңда Шымкентте Өтегенов көшесіндегі шатқалда "ЛТД Тұрмыс" ЖШС-нің қызметкерлері 15 мыңдай көшетті отырғызуда.
