Астана қаласында өтетін "ЭКСПО–2017" халықаралық көрмесiне келушілерге Оңтүстік Қазақстан облысы 10 тонна балмұздақ жібермек, деп хабарлайды "Оңтүстік Қазақстан" газеті.
Ауқымды iс-шараға бүкіл өңiрдiң кәсiпкерлерi әзiрленiп жатыр. Шетелдiк қонақтар мен отандастарымыз елорда төрiнде тек ғылыми жетiстiктердi көрiп қана қоймай, Қазақстан өндiрушiлерінiң азық-түлiк өнiмдерiн де тұтынады. Сол компаниялар арасында ОҚО-лық балмұздақ шығаратын екi кәсiпорын бар.
Облыстық ауыл шаруашылығы басқармасының мәлiметiне сүйенсек, көрмеге орай Астанаға "Балмұздақ" және "Азия холод" жауапкершiлiгi шектеулi серiктестiктерi мамыр айында 5 тоннадан, жалпы 10 тоннадай балмұздақ жiбередi. Сұранысқа байланысты жоспар өзгерiп, балмұздақ көлемi артуы да, кемуi де мүмкiн. Таяуда қос компанияға басқармадан ресми хат жолданып, жоспар жасалды. Ең бастысы, отандық тауар өндiрушiлердiң "ЭКСПО – 2017" көрмесiне көптеп шақырылуы бiздiң кәсiпкерлерге өте тиiмдi.
Көрменi ұйымдастырушылардың таңдауы бұл компанияларға бекер түсiп отырған жоқ. Төлеби ауданында орналасқан "Балмұздақ" ЖШС өнiмдерiнің сапасы мен тiл үйiрер дәмi талайларды тамсандырып үлгерген.
1987 жылы ашылған "Балмұздақ" ЖШС тәуелсiздiк алғаннан кейiн қанатын кеңге жайып, өнiм көлемi арта түстi. Елiмiздiң бiрнеше облысының нарығын жаулаған төлебилiктер көршiлес Қырғызстанға да балмұздақ жiберген. "Азия холод" ЖШС бүгiнде өз өнiмдерiмен жұртшылыққа ұнап жүр. Шымкенттiң балмұздағына сұраныс жоғары.
