Астана қаласында білім беру гранттарын алуға, сондай-ақ магистратура мен докторантураға түсуге көмектесемін деп азаматтарды алдаған ер адамға қатысты сот үкімі заңды күшіне енді, деп хабарлайды inbusiness.kz сайты.
Астана қаласы прокуратурасының мәліметінше, сотталушы өзін білім беру саласында ықпалды байланыстары бар адам ретінде таныстырып, жоғары оқу орындарына түсіру мен грант алып беру мәселесін шешуге қабілетті екенін айтқан. Оның сөзіне сенген азаматтар қомақты қаражат тапсырған.
Алайда іс жүзінде ешқандай қызмет көрсетілмеген. Тергеу барысында алынған ақшаны күдіктінің жеке қажетіне жұмсағаны анықталды.
Қылмыстық әрекеттің салдарынан 111 адам зардап шеккен. Келтірілген жалпы материалдық шығын шамамен 70 миллион теңгені құрады. Жәбірленушілердің басым бөлігіне келтірілген залал өтелмеген.
Сотталушы өз кінәсін мойындағанымен, сот оған 4 жыл мерзімге бас бостандығынан айыру жазасын тағайындады. Сот үкімі 2026 жылғы 12 мамырда заңды күшіне енді.
Прокуратура азаматтарға жоғары оқу орындарына түсу мен білім беру гранттарын алу тек заңнамада белгіленген тәртіппен жүзеге асырылатынын еске салып, мұндай мәселелерді ақылы түрде шешіп беруге уәде ететін адамдарға сенбеуге шақырды. Құқық қорғау органдары осындай фактілерге тап болған жағдайда дереу хабарласуды сұрайды.
