Астанада Қуандық Бишімбаевтың сот отырысы жалғасып жатыр. Бүгін Бишімбаев Нүкенова қайтыс болар алдында хабарласқан көріпкелден жауап алынып жатыр, деп хабарлайды inbusiness.kz сайты.
Оның айтуынша, ол Бишімбаевпен 1,5-2 жыл бұрын анасы Альмира Нұрлыбекова арқылы танысқан.
Бишімбаев оған жеке мәселелері бойынша, атап айтқанда, жұмыс және бизнес саласындағы "тағдырын" білу үшін хабарласып отырған.
Нүкенованы өлтірілген түні Бишімбаев көріпкелге бірнеше рет қоңырау шалған.
"9 қарашада ол қоңырау шалып: "Салтанат екеуміз мас болып, қатты ұрысып қалдық" деді. Мен мұны маңызды мәселе деп қабылдаған жоқпын. Бірінші қоңырау сағат 15.00-де және 16.00-де болды. Мен оған дереу жедел жәрдем шақыруды айттым. Ол маған: "қайдағы жедел жәрдем? Есін жинасын" деді. Оның ұйықтап жатқанын, қозғалмайтынын айтты. Ол адам төзгісіз болды. "Салтанаттың жағдайы жақсы" деп жазуымды сұрады. Ол мас болды", - дейді көріпкел.
