Премьер-Министр Олжас Бектенов Үкімет отырысында елордаға жақын елдімекендердегі негізгі мәселелерді атады, деп хабарлайды inbusiness.kz сайты.
"Қалаға жақын маңдағы елдімекендерде халық санының күрт өсуі мен елордаға күнделікті келіп-кететін адамдардың легі – агломерацияның негізгі мәселелері. Бұл Астана қаласының инфрақұрылымы мен экологиясына және қауіпсіздігіне түсетін жүктемені едәуір арттырады. Адамдар елордаға жақын маңда тұрғысы келеді. Оны түсінуге болады. Алайда, мұндай көші-қон еңбек нарығына әсерін тигізеді, облыста жұмыссыздықтың өсуіне ықпал етеді", - деді Олжас Бектенов.
Айтуынша, қала маңындағы ауылдардың сумен қамтамасыз ету, су бұру, электрмен жабдықтау, жолдардың жай-күйі сияқты мәселелері баршылық.
"Кешенді жоспарды іске асыру кезінде көлік-коммуникация, сауда-логистика, инженерлік-коммуналдық және әлеуметтік инфрақұрылымның біртұтас кешенін құру үшін инвестициялар тартуға қолайлы жағдай жасау керек. Агломерацияның негізгі мақсаты да осы болуға тиіс. Сондай-ақ, 45 ауылдық елді-мекеннің әрқайсысына өзіндік экономикалық ерекшелік беру қажет. Сол кезде ауылдармен қатар, Астана қаласы да мал және өсімдік шаруашылығының, құрылыс индустриясының, сондай-ақ басқа да салалардың қажетті өнімдерімен өзін-өзі қамтамасыз етуге қол жеткізе алады",- деп жалғастырды ол.
Үкімет басшысы елорда айналасында азық-түлік белдеуін құру мәселесі толығымен шешілмегенін де жеткізді. Айтуынша, мұны жоғарыда атаған елдімекендерде жасауға болады.
