Ереуілшілерді тарату үшін тәртіп сақшылары суатқышты қолдануда. Әзірге жарақат алғандар туралы ақпарат жарияланбады. Наразылық шаралары ел астанасы Нейпьидода, Янгонда, Мандалайда және бірқатар қалада өтіп жатыр. Бас көтергендер әскерилерден президент пен мемлекеттік кеңесшіні босатуды талап етуде.
1 ақпанда әскерилер төңкеріс барысында Мьянманың мемлекет басшыларын қамауға алып, бір жылға төтенше жағдай жариялаған еді. Қазір билік Қарулы күштердің бас қолбасшысы Мин Аунг Хлайнның қолында. Ал президенттің қызметін вице-президент Мьинт Шве атқарып жатыр. Бұған дейін әскерилер 400-ге жуық адамды (қатарында депутаттар бар) босатқан еді. Бірақ "демократияны қолдайтын Ұлттық лига" деп аталатын партияның басшылығы мен оның жетекшісі Аун Сан Су Чжи әлі де үй қамағында.
АҚШ, Аустралия, Британия, ЕО және БҰҰ қамаудағыларды босатуға үндеп отыр.
Табиғат Нұрболат
Фото: ft.com
