Премьер-Министрдің бірінші орынбасары Роман Скляр 8 айдың қорытындысы бойынша өңдеу өнеркәсібінің даму қарқыны туралы хабарлады, деп жазады inbusiness.kz сайты.
Саладағы өндіріс көлемі 14,9 трлн теңгені құрады, өткен жылғы көрсеткіштен 4,9%-ға артық.
"Металлургиядағы өсім ұлттық инвестор "Qarmet"-тің келуімен және кешенді жаңғыртудың басталғанымен байланысты. Нәтижесінде өндірістік тұрақтылық, қызметкерлердің орташа жалақысының 13,5%-ға көбеюі байқалады. 2024 жылы шамамен 1,3 трлн теңгеге 180 жобаны іске қосу жоспарланған", – деді Роман Скляр.
Металлургия, мұнай өңдеу және мұнай-газ химиясы, машина жасау, химия салаларында 17 серпінді жобаны іске асыру ерекше бақылауда екені атап өтілді.
"Әрбір жоба бойынша егжей-тегжейлі жоспарлар бекітілді. Жергілікті қамтуды дамыту жөніндегі жұмыс шеңберінде отандық өндірушілермен ұзақ мерзімді шарттар мен оффтейк-келісімшарттар жасасуды көздейтін заңнамалық түзетулер әзірленді. Тауар өндірушілерді шикізатпен қамтамасыз ету тетігі енгізілді. Қазірдің өзінде ірі жеткізушілермен 25 келісім жасалды", – деді Скляр.
