Денсаулық сақтау вице-министрі Ержан Нұрлыбаев онкологиялық ауруларды емдеуге бөлінетін қаражатқа қатысты сұраққа жауап берді, деп хабарлайды inbusiness.kz сайты.
Журналистер 2025-2027 жылдарға арналған бюджетте онкологиялық ауруы бар адамдардың дәрі-дәрмегіне бөлінетін қаражат қысқара ма деп сұрады.
"Біз үшін онкологиялық ауруы бар науқастарды дәрі-дәрмекпен қамту мәселесі маңызды. Себебі бұл емдеу сапасына және адамдардың өмір сүру ұзақтығына әсер етеді. Дәрілік заттардың өтінімі нақты диспансерлік есепте тұрған пациенттерге жасалады. Бірақ қосымша пациенттер пайда болған жағдайда қосымша көлемге өтінім жасау қажет. Жыл сайын онкологиялық ауруы бар пациенттердің саны 20 мыңнан астам адамға өседі. Сондықтан бұл өте күрделі міндет. "СК-Фармация" дәрілік препараттардың таусылмайтын көлемін құруға қатысты мәселелерді пысықтады. Оның ішінде онкологиялық дәрі-дәрмектер де бар. Қазір басқа диспансерлерден онкологиялық науқастарға арналған дәрілік заттардың профициті пайда болған жағдайда қайта бөлу мүмкіндігі пайда болды", – деді вице-министр.
Ержан Нұрлыбаевтың айтуынша, әр ауру мен әр пациент бойынша емдеудің жеке схемасы әзірленеді.
"Сондықтан дәрі-дәрмектердің осындай пулын қалыптастыру туралы шешім қабылданды", – деді спикер.
Денсаулық сақтау вице-министрі келесі жылы онкологиялық ауруы бар науқастардың дәрі-дәрмегіне бөлінетін қаражат жоқ дегенде осы жылдың шегінде сақталатынын жеткізді.
"Онкологиялық ауруларды емдеуге бөлінетін қаражат азаймайды", – деді спикер.
