Қаражат қолына тигеннен кейін ер адам байланысқа шықпай қойған. Алданғанын түсінген әйел дереу полицияға жүгінген, деп жазады inbusiness.kz сайты.
Облыстық полицияның мәліметінше, 62 жастағы әйел әлеуметтік желілердің бірінде шетелдік азаматпен танысқан. Ер адам өзін америкалық әскери офицер ретінде таныстырып, екеуі ұзақ уақыт хат алмасқан. Ол жылы сөздерімен баулап, болашақта кездесетінін айтқан.
Кейін күдікті қаржылық қиындыққа тап болғанын айтып, Қазақстанға келген соң ақшаны толық қайтаратынын жеткізген. Сеніп қалған әйел оған бірнеше рет ақша аударған.
Аталған дерек бойынша сотқа дейінгі тергеу амалдары жүргізіліп жатыр.
Полиция интернет арқылы танысқан бейтаныс адамдарға ақша жібермеуге, жеке және банк деректерін құпия ұстауға және күмәнді өтініштерге сақ болуға шақырады.
