Оңтүстік Кореяның Муань әуежайында апатқа ұшыраған Boeing 737-800 ұшағының екі қара жәшігі әуе кемесінің құлау сәтін жазбаған, деп хабарлайды inbusiness.kz сайты KBS WORLD Radio порталына сілтеме жасап.
Ақпаратқа сәйкес, екі борттық өздігінен жазғыш ұшақтың бетон конструкциясымен соқтығысуына дейін төрт минут бұрын деректерді тіркеуді тоқтатқан. Енді қара жәшіктің ақпаратты жазбау себебі анықталады.
Құрылғыларға талдау жүргізіп жатқан АҚШ-тың ұлттық көлік қауіпсіздігі кеңесі сарапшыларының мәліметінше, деректерді жазу 29 желтоқсан күні 8 сағат 58 минут 50 секундта тоқтады. Әуе кемесі бетон конструкциясымен 9 сағат 3 минутта соқтығысқан. Деректердің жоғалуы апаттың себебін анықтауды айтарлықтай қиындатуы мүмкін. Себебі апатқа дейінгі соңғы сәттің жазбалары өте маңызды. Апаттың алдын-ала себебі ретінде шассиді істен шығуы айтылып жатыр.
